Sezonê ravêrteyî de Ece Kardeşler o ke bi formaya Amedsporî performansêko serkewte nawit û mîyanê kadroyo ke tarîxê taximî de reya verêne vejîya Lîga Super de ca girewt, kulûbî ra xatir. Qelevano tecrubeyin hesabê xo yê medyaya sosyale ra mesajêk weşana, va ke wexto ke Dîyarbekir de vîyarna do heyatê ey de tim wayîrê cayêko taybetî bo.
“Ez do samîmîyetê Dîyarbekirî xo vîr ra nêkerî”
Ece Kardeşlerî mesajê xo de va ke Dîyarbekir de tena futbol kay nêkerd, eynî wext de dostanîyê ercîyayî zî peyda kerdî û wina va: “Seranserê nê wextê ke mi tîya de vîyarna de, mi tena seha de mucadele nêkerd; mi bajarêko weş şinasna, zaf merdimê ercîyayî qezenc kerdî û xatireyê ke ez nêşena xo vîr ra bika arê kerdî. Ez do samîmîyetê Dîyarbekirî û heskerdişê merdimanê nê bajarî tim bi hawayêko weş bîyara vîrê xo.”
Kardeşlerî da zanayîş ke mîyanê kadroyê ke Amedsporî tarîxê xo de seba reya verêne vejiya Lîga Super de ca girewtiş seba ey rûmetêko pîl o û va: “Bîyayîşê parçeyê kadroyê ke tarîxê xo de reya verêne vejiya Lîga Super seba mi do sey xatireya ke nêna vîrkerdiş bimanî.”
Ece Kardeşlerî mesajê xo yê xatirî de sipasîya xo pêşkêşê îdarekeranê kulûbî, heyetê teknîkî, hevalanê xo yê taximî û terefdaran kerd û va: “Mîyanê nê wextî de ez sipasîya xo pêşkêşê îdarekeranê ma, xoceyanê ma, hevalanê xo yê taximî, xebatkaranê kulûbî û terfdaranê ma yê ke her wext paştî dayê ma kena. Gama ke ez şina, dima ra dostanîyan, xatireyanê weşan û hîkayeyêka zaf taybete ya ke ma pîya nuşte veradana.”
