Amed de konsero ke tarîxê muzîkê bajarî de sey "yewin" yeno qebulkerdiş, ame dayîş. Orkestraya Senfonî ya Tîgrîsî ke orkestraya veren a senfonî ya xusûsî ya Amedî ya û hunermend Mehmet Atli vejîyayî sehne.
Mehmet Atli bi eseranê ke Kurmancî, Dimilî (Zazakî) û Tirkî vatî; tarîx, dej, hêvî û hîkayeya cografyayêka qedîme newe ra ardî ziwan. Heto bîn ra binê îdareyê şef Serhat Atalayî de Orkestraya Senfonî ya Tîgrîsî renginîya mîrasê kulturî yê Kurdan ard sehne.
Mehmet Atli: Xeyalê mi bi raştî
Mehmet Atliyî badê konserî hîsê xo wina ardî ziwan:
"Eşnawitiş û dayîşeşnawitişê deyîranê mi bi duzanê senfonîkî, xeyalanê mi yê tewr girdan ra yew bi. Caamayîşê nê xeyalî Amed de, qandê mi zaf bimana û erjaye bi. Qandê virazîyayîşê konserê winasî, sere de Şef Serhat Atalay û ê ke duzankerdeşê eseran de keda înan estbî; ez heme endamanê Orkestraya Senfonî ya Tîgrîsî rê, embazanê xo yê sehne rê, kedkaranê Arista Organîzasyonî rê, xebatkaranê Şaredarîya Girdî ya Amedî ke salona xo ma rê akerd, heme ekîbê teknîkî ke konser de keda înan vîyarte, wezîfedaranê salonî rê û na şewa xusûsî de goşdaranê mi rê ke salon pirr kerd û veng da vengê ma, zerrî ra sipas kena."