Komeleya Ekolojîye, vera talankerdişê xoza ya Şîrketa Oyak Çîmento ke dewa Goma Husîka ya qezaya Çinarî (Xana Axpar) de ya, çalakîye organîze kerde.
25ê Teşrîna Peyêne de bi seyan esker û polîsî bi TOMAyan seba pawitişê ocaxa madenî yê şîrketî kewtbî dewe û dewijan hêrsê xo mojanabi.
Vizîr bi rayberîya Komeleya Ekolojîye ya Amedî; Wekîlê Wanî yê DEM Partî Sînan Çîftyurek, Hemserekê Şaredarîya Pasûrî Murat Ay, Hemserekê Şaredarîya Çinarî Şerîf Arzu, Komîsyonê Huqûqê Bajar û Dorûverî yê Baroya Amedî û zaf kesî şîy dewe û çalakîye viraşte.
"No welatê bawkalanê ma yo"
Wekîlê DEM Partî Sînan Çîftyurekî çalakîye de qisey kerd û va: "Hukmatî çend aşmî verê cû seba şîrketan qanûnêk vet û bi nê qanûnî heta peynî vernîya şîrketan kerde a. Vera nê hewldanî, ma do ekolojîye bipawê. Seba naye ganî ma ekolojîk biciwîyê. No welatê qedîm ê pî û kalanê ma yo. Ma heta peynî paşt danê şima. Şima xoverdayîşê xo bidomnê."
Heta madenî rayîrşîyayîş
Qiseykerdişî ra dima kome dewe ra heta qîlo ke uca ocaxe ameya viraştene, rayîr ra şî. Rayîrşîyayîş de pankarta "Xozaya ma xobîyayîşê ma ya, ma dest ci ra nêancenê" û dowîzê "Ma vera talanî xoza û cuye pawenê", "Tîya warê pî û kalanê ma yo" ameyî berzkerdiş.
Çalakîye bi ronîyayîşê berûyan qedîyaye.
Xebere: Mehmê Hesenî Xirabayij