ZAZAKÎ NEWS - Çarçeweyê çalakîyanê 21ê Sibate (Gucige) Roja Ziwanê Dayîke ya Dinya de, bazarê semtî û esnafan rê etîketê fiyetî yê Kurdkî û tabelayê cayê karî ameyî vilakerdiş.
Mudurîya Kulturî ya Şaredarîya Peyasî (Kayapınar), Komîsyonê Ziwanî, Mudurîya Pawitiş û Averberdişê Ziwanî ya Şaredarîya Girde ya Amedî, rayberê MED-DERî û endamê meclîsî tewrê çalakîye bîyî.
Esnaf û welatîyan rê materyalê cîya-cîyayî ameyî teqdîmkerdiş. Çalakîye de, seba esnafanê bazarî etîketê fiyetî yê ke ser o nameyê zerzewatî bi Kurmancî û Zazakî nusîyayî; seba cayanê karî zî tabelayê ke ser o “Akerde-Girewte” û “Şima Xêr Ameyî” nusîyayî, ameyî dayîş.
Eleqeyêko pîl ame mojnayîş
Heyeto ke esnafanê bazarî reyde qisey kerd û goş da waştişanê înan, îfade kerd ke xebitnayîşê ziwanê dayîke, pêro waranê cuyayîşê rojaneyî de, bi taybetî tîcaret de, seba pawitişê mîrasê kulturî krîtîk o.
Esnafanê bazarî û welatîyanê ke seba erînayîşê çî-mîyan ameybî, keyfweşîya xo ard ziwan û eleqeyêko pîl moja çalakîye.
