ZAZAKÎ NEWS - Çewlîg de qezayêka trafîkî ya ke di otomobîlî kewtî têmiyan de, babî û lajê ey merdî. Kerim Kayuntu yo ke qeza de giran birîndar bibi, nêweşxane de pa heme mudaxeleyan nêame xelesnayîş û weşîya xo vîndî kerde.
Qeza, vizêr saetanê nêmerojî de rayîrê Çewlîg-Dara Hênî ser o amey meydan. Otomobîlê bi pîlakaya 34 AKS 487 û yê bi pîlakaya 78 AG 598 kewtî têmiyan û netîce de 5 kesî birîndar bîyî.
Birîndarî pê ambûlansan wedarîyay Nêweşxaneyê Dewlete yê Çewlîgî. Birîndaranê giranan ra Aydin Kayuntu (55) weşîya xo vîndî kerde.
Lajê Aydin Kayuntuyî Kerim Kayuntu (22) yo ke qeza de giran birîndar bibi û tedawîya ey nêweşxane de dewam kerdêne zî, pa heme mudaxeleyanê doktoran nêame xelesnayîş û merd.
Heto bîn ra ame zanayîş ke çatrayîro ke tede qeza bîya de verê cû zî zaf qezayî qewimîyayê û qezayan de zaf kesî merdî. Her çiqas şar wazeno wa uca de trafik bêro raştkerdiş zî îdarekarî çatrayîr de tedbîran nêgênê û bene sebebê qezayan û merdişan.