ZAZAKÎ NEWS - Qezaya Amedî Karaz de cinîyêk kişîya. Yew camêrdî, netîceyê munaqeşeyêkî de cinîya xo kişt û xalê cinîye zî kerd birîndar.
Goreyê malumatan, vizêr şewe Mehleya Şêx Şerafeddînî ya qezaya Karazî de, mabênê M.D., cinîya ey O.D. û xalê cinîya ey A.T.yî de, bi sebebo ke hema nêno zanayîş munaqeşeyêk vejîya.
Dima ke munaqeşe giran bi û pêrodayîş vejîya, M.D.yî tifingê xo ante, guleyî nayî cinîya xo O.D. û xalê aye A.T.yî ro.
O.D.ya ke bî hedefê guleyan, giran birîndar bîye û cayê hedîseyî de weşîya xo vîndî kerde. Xal A.T. zî bi giranî birîndar bi.
Dima ke cîranan û dorûverî îxbar kerd, ekîbê weşîye û polîsî şawîyay cayê serebûtî. Ekîbanê weşîye dima ke cayê qezayî de mudaxeleyê verên kerd, A.T.yo birîndar bi ambûlans berd nêweşxane.
Qatil M.D.yo ke dima hedîseyî hetê ekîbanê polîsan ra ame tepiştiş. Derheqê cînayetî de tehqîqatêko hîra yeno ramitene.
