Dewa Xwarike ya qezaya Gimgimî ya Mûşî de, çalakîya nobeta çadire ya ke vera projeyê Santrala Enerjîya Jeotermalî (JES) ameye destpêkerdiş, roja 30ine de dewam kena. Nobeta tebîatî ya ke hetê Meclîsê Ciwanan ê Platformê Ekolojî yê Gimgimî ra ameye destpêkerdiş û aşmêk o dewam kena. Nonete de pankartê bi nuşteyê “Şarê Gimgimî santrala enerjîya jeotermalî nêwazeno. Dest mede aw û herra mi” û “Ma xoza, bawerî û ameyoxê xo pawenî” ameyî akerdiş. Hetê bînî ra koma muzîkî ya herêmî Koma Brîndar û hunermendê herêmî Serkan Taş semedê paştîdayîşî kilamî vatî. Welatîyan meydanê nobete de demêko derg govende girewte.

Şewa bîne dewijê dewanê Mişko, Başkent, Seferek û Kûnavê nobete dewijanê bînan ra teslîm girewt. Xoverdayîşê welatîyan ê vera projeyê JESî na mintîqa de dewam keno.