ZAZAKÎ NEWS - - Cinîya hunermendê muzîkê şarî Hasret Gultekînî yo ke Qetlîamê Sêwas Madimakî de amebi qetilkerdene, Yeter Gultekîne, Almanya de nêweşxaneyo ke tede tedawîya qanserî vînayêne de weşîya xo vîndî kerde.
Ame musayîş ke cenazeya Yeter Gultekîne ya ke serranê 1980yî ra nat Almanya de ciwîyayêne û demêk o ke vera qanserî mucadele kerdêne, do Koln de bêra definkerdiş.
Yeter Gultekîne, 2ê Temmuza 1993yî de hedîseya Otela Madimakî ke tede 33 roşinvîrî ameyî veşnayîş û qetilkerdiş, uca de mêrdeyê xo vîndî kerdbi. A roje ra nat, a bîbî nameyanê sembolîkan ê waştişê edaletî ra yew.
Gultekîne ke dewayê qetlîamî nêzdî ra teqîb kerdêne, seba ke qetlîam nêro vîrkerdiş û mesulî hesab bidê, refanê tewr vernîyan ê mucadeleyî e ca girewt.
Sîyasetmedaran ra mesajê serweşîye
Wefatê Gultekîne ser, nameyanê sîyasîyan mesajê serweşîye weşanayî.
Wekîlê Stenbolî yê CHPyî Dogan Demîr û Endamê Meclîsê Partîye Mahîr Yukselî, mucadeleyê edaletî yê Gultekîne yo ke bi serran o dewam kerdêne ard vîr û seba keyeyê aye sebir waşt.
Wekîlê Partîya DEMî Celal Firatî zî nê îfadeyî xebitnayî: "Aye tena tazîyeya mêrdeyê xo nêgirewt, eynî wext de mucadeleyê heqîqet û edaletî da."
