ZAZAKÎ NEWS — Grûba Vateyî serran o ke seba Zazakî xebatanê akademîkankena û serra 1996î de Swêd de ameya ronayîş û hedefê ci standardîzekerdişê Zazakî yo. Gündüzî îfade kerd ke UNESCO vano "Zazakî vîndî bena" û va: "Eke wina dewam bıkero, Türkiye de Kurmancî zî mireno. Eke ma wayîr nêvejîyê, wezîyet zaf xirab o."
Gündüzî va ke, dezgehê demokratîkî wayîrîya Zazakî nêkenê. Zaf telewîzyon û radyoyê Kurmanckî estê la yê Zazakî çin ê. Tîyatroyê Zazakî çin o Xebatê ke estê sey akademîk manenê. Dezgehê sey Enstîtûyê Kurdî yan zî MED-DERî zaf micadele kenê, labelê bes nîyo. Ziwanî de prestîj nêmendo. Sebebê ci zî temsîlkarê sîyasî û kulturî yê. Ê kare xo pê Tîrkî kenê û na rewşe prestîjê ziwanî kêm kena. Seba ke ziwan vîndî nêbo, ganî dezgehî bêrê têhet û xebatanê xurtan bîkerê."
Deniz Gündüzî va: "Zaf radyo û telewîzyonê Kurmancî estê, labelê yê Zazakî çîn ê. Amed de 500 hezar Zazayî ciwîyenê, labelê hema zî tîyatroyêka Zazakî çîn a. Ma vanî 'Kurdkî', labelê tenê Kurmancî fam beno. Beledîyeyan de zî ziwanê ma Kurmancî ra pey yeno nuştiş. Na rewşe canê mi dejnena. Seba tîyatroyê Zazakî dezgehê xoserî lazîm ê."
Gündüzî seba çareserîye zî nê pêşnîyazî kerdî: "Şarê ma ziwanê xo qisey keno, labelê nêşeno binûsno. Ma ganî herinda şîyayîşê dewan û mehlayan, alfabe û nuştiş bimûsnê şarî. Komel amade yo, labelê organîzasyon çîn o. Hereketa Kurd zaf xurt a, eke na mesele xo rê biko derd û cad biko do çareser bîkero."
Çime: Ajansa Mezopotamya