Derhênerê Dêrsimij Kazim Oz bi îddîaya ke "propagandaya rêxistine kerda" amebi tepişyayîş. Oz badê ke îfadeyê xo da, serbest bi.

Serdozgerîya Komare ya Stenbolî fîlmê "Zer" ra derheqê derhêner Kazim Ozî de tehqîqat akerd. Çarçewaya tehqîqatî de Oz vizêr (22ê Çeleyê Peyênî) ame tepiştiş.

Derhêner Kazim Oz vizêr seba ke îfade bido şibi Fermandarîya Cendirmeyan a Kemerbûrgazî û uca amebi tepiştiş û neqlê Edlîyeya Stenbolî ya Çaglayanî bi.

Badê îfadeyî derhêner Oz dozgerî ra şawîya mehkemeya nobedar. Mehkeme qerarê verdayîşê ey da.

Derhêner Kazim Oz 16ê Tişrîna Verêne ya 2024î de zî bi îddîaya ke "propagandaya rêxistine kerda" îfade dabî.