Dîyarbekir de Peynîya nê hewteyî de derheqê Zazayan de semînerêk estbi.
Doç. Dr. Ercan Çağlayanî pêşkêşîya xo de behsê ewnînayîşê Kemalîzmî yê vera Zazayan kerd.
Çağlayanî da zanayîş ke ronîyayîşê Komara Tirkîya ra tepîya îdeolog û medyaya Kemalîzmî Zazayan çîne hesibnayê, înan bi nameyê xirabinî name kerdê û kerdê ke nasnameyê înan bikê tirk û bi serran înan ser o polîtîkayê surgunkerdişî, qirkerdişî û asîmîlasyonî ramitê.
Doç. Dr. Ercan Çağlayanî semê ronîyayîşê Komara Tirkîya ra û hetanî nika nuşteyê ke derheqê Zazayan de çapemenîya kemalîstan de vejîyayê mojnayê mêmanan.
Semîner hetê Enstutîya Cigêrayîşanê Sosyalî û Sîyasalî (Diyarbakır Siyasal ve Sosyal Araştırmalar Enst-DİSA) ra ame tertîpkerdiş û moderatorîya semînerî hetê Avukat Mehmet Emîn Aktarî ra amey kerdiş.
Xeylê kesî amê semîner û badê semînerî Çağlayanî rê persî ameyî kerdiş û semîner pê pers-cewab qasê 2 saetî dewam kerd.
Doç. Ercan Çağlayan Kam o?
Ercan Çağlayan serra 1980î de şaristanê Çolîgî qezaya Bongilanî de ameyo dinya. Mehtebê Seretayî û Mîyanênî Bongilan de wend. Unîversîteya Atatürkî ya Erzurumî de beşê tarîxî de lisans, lîsanso berz û doktora kerd. Babetanê tarîx, nijadperestî , netewe-dewlet, kêmnetewî , modernîteya Kemalist û maduniyet ser o nuşteyê ey çap bîyê.
Kitabê ey: Cumhuriyet’in Diyarbakır’da Kimlik İnşası (1923-1950) (İletişim Yayınları, 2014), Zazalar: Tarih, Kültür ve Kimlik (İstanbul Bilgi Üniversitesi Yayınları, 2016) ve Kemalist Ulus-Devletin İnşası: Eğitim, Kültür, Mekân ve İskân Politikaları (Açılım Kitap, 2018).
Xusuî kîtabê ey ko ke Zazayan ser o nuşto, derheqê tarîx û kulturê Zazatan de sey kitabêko muhîm yeno vînayîş.
Çağlayan derheqê Zazayan, xususî zî demê ronîyayîşê Komara Tirkîya ra nata polîtîkayê Kemalîzmîê ser Zazayan ser o panel û semîneran dano û ê derheqî de zanayîşan dano.
Fatma Yılmaz
