ZAZAKÎ NEWS - Koma muzîkî ya cinîyan Zaza Women Music Projectî eşkera kerd ke ê seba ke nameyê koma înan de vateyê "Zaza" esto, Festîvala Xoza û Kulturî ya Mûnzûrî rê nêameyê dawetkerdiş. Kome, bi yew eşkerayî da zanayîş ke muracatê înan verî qebul bîyo, la dima ra amo redkerdiş.
Emserr Festîvala Xoza û Kulturî ya Mûnzûrî ya 23ine bi sloganê “Dêrsim cu yo; destê xo mene xoza, îrade, ziwan û bawerîya mi!” yena viraştiş.
Zaza Women Music Projectî (Projeyê Muzîkî yê Cinîyan ê Zazayan) vizêr eşkerayîyêk vila kerd û pare kerd ke Komîteya Festîvale ê teberê bernameyî de verdayê.
Kome da zanayîş ke muracatê înan verî qebûl bîyo la dima ra amo redkerdiş, û sey behane zî vateyê “Zaza” yo ke nameyê kome de yo, ameyo mojnayîş.
Endamanê kome vat ke, înan rê ameyo vatiş ke, “Şima eşkenê sey kesan beşdar bibê, la bi nameyê kome ney.”
Endamanê kome da zanayîş ke no qerar rasterast înan rê nêameyo vatiş û înan bi îmkanê xo no malumat dest visto.
Zaza Women Music Projectî da zanayîş ke ê bi Zazakî/Kirmanckî lawikanê eşqî, anonîm û melodîyanê şarî vanê.
Kome wina va:
"Armancê ma yo yewin o bi ke ma dîqet biance yew ziwanî ser o yo ke binê rîskê vîndîbîyayîşî de yo, û cinîyan ser.”