Heyetê Rayberdişî ya Cemîyetê Rojnamegeranê Başûr û rojhelat (GGC), dima ke rojnameger Mürsel Acay yew pêrodayîşo bi çekan de mend û birîndar bi, çarçiweya kampanyaya " Bêveng Memene! Kuçeyî Teslîmê Çeteyan û Çekanê Bêrûxsatan Nêbenê " de sazgehanê Amedî zîyaret kerdî.
Heyeto ke Serekê GGCî Felat Bozarslan, Serekwekîl Aytaç Akhan, Sekretera Pêroyî Firuzan Behlülgil û endamê heyete Rayberdişî Hozan Adar tede bî, verî Walîyê Amedî Murat Zorluoğlu zîyaret kerd.
Zîyaretî de xebatê ke çarçiweya têkoşînê vera çekdarbîyayîşê ferdî û rêxistinbîyayîşê sûcan de yenê bicaardene, ameyî erjanyene. Walî Zorluoğlu û Mudirê Ewlekakarîya Bajarî Gökdumanî da zanayîş ke ê qîmet danê na kampanya û derheqê xebatanê asayîşî yê ke bajar de yenê bicaardene de haydarî dayî. Zorluoğluî seba na kampanyaya ke wazena haydariyêka komelî virazo, sipasîya GGCî kerd.
Heyetî dima Serdozgerê Cumhurîyetî yê Amedî Erdal Kuruçay zîyaret kerd..
Şaredarîya Bajarê Girdî ra mesajê paştgirîye
Cayo tewr peyên yê heyetê GGCî Şaredarîya Bajarê Girdî ya Amedî bî. Pêvînayîşo ke Hemsereke Serra Bucak, Hemsvervatoxa Meclîsî Demet Ceylan û Hetakar Sekreterê Pêroyî Muhabbet Erdoğmuş bîbî de, seba kampanyaye mesajê paştgirîye ame dayene.
Hemsereke Bucak da zanayîş ke ê qîmet danê xebatanê vera şîdetê kuçeyan û çekdarbîyayîşê bêrûxsatan, û îzah kerd ke ê do her tewir paştgirî û piştî bidê kampanya.
