ZAZAKÎ NEWS - Dewa Xarîka ya qezaya Gimgimî ya Mûşî de, xoverdayîşê vera Projeyê Santrala Enerjîya Jeotermalî (JES) dewam keno.
Şarê 16 dewanê ke do nê projeyî ra tesîr bigîrê, mintiqa de dore bi dore nobete gênê. Zaf temsîlkarê partîyanê sîyasîyan û rêxistinanê komelê sîvîlî yê bajaranê cîyayan zî, roje mîyan de dewijanê nobetdaran zîyaret kenê û paştdayîşê xo mojnenê ra.
paştdayîşî bajaranê cîyayan ra ameyê
Goreyê xebera Ajansa Mezopotamya, welatijêko bi nameyê Ethem Dîkmen seba zîyaretê xoverdayoxan Îzmîr ra ameyo. Dîkmenî îzah kerd ke projeyê JESî "polîtîkaya dewlete" yê û va: "Ewro eşkenê bêrê Gimgim, meşte şêrê Çêrme yan zî Çewlîg. Coka, teberê têkoşînê hemparî de tu şansê ma çin o."
Yewna welatija ke Îzmîr ra ameya, Kîymete Kanmaze zî îfade kerd ke ê vera JESî de yê û ganî erdê înan çîn nêba.
Îdarekara Şubeyê Îzmîrî yê Komeleya Elewîyanê Demokratîkan (DAD) Elîfe Hurustane da zanayîş ke projeyê JESî de tehlûkeyê zaf pîlî est ê û bale ante ser ke ê do heta betalkardişê projeyî têkoşîn bidê.
Elîfe Hurustane va, "Tena warê ma mîyanê destê ma de mendo" û wîna dewam kerd: "Têkoşînê ma do heta peynî dewam biko."
Nurane Demire zî va xoverdayîşo ke vera projeyî dest pêkerdo muhîm o û ard ziwan ke welatijî seba pawitişê erdê xo mîyanê xoverdayîşî de yê.
Do rayşîyayîş bêro kardiş
Goze Çîçeke ke dewa Xaşxaşî ya Gimgimî ra ya û Kocaelî de nişena ro, beşdaranê çalakîye ra yewe bîye ke paştî daye. Goze Çîçeke ard ziwan ke a seba destekdayîşê nobete Kocaelî ra ameya û wîna va:
"Zaf cayanê Tirkîya de xebatê cîgêrayîşê madenan est ê. Seba ke ma vera nînan de hesasîyetê xo bimojnê, ma tîya de yê. Do embazê ma yê Êlih, Mûş, Îzmîr û Xarpêtî zî bêrê. 21ê Gulane de (ewro) ma do ver bi Gireboayî rayşîyayîş bikê. Qîymetê na herêm (mintiqa) seba merdiman zaf gird o. Ma qîymet danê herra xo û zîyaretgehanê xo."
Nîlufer Mavîdenîza ke va a bi mexsedê paştdayîşê xoverdayîşanê ekolojîyî yê cayanê bînan yê Tirkîya geyrena zî va: "Ma pawenê ke her kes bêro tîya. Eke ti nêveşê, ez nêveşa, do tarîtîya ma senîn bivejîya roştîye?"
Hasan Demîrkaiyê ke Xarpêt ra ameyo, nêrazîbîyayîşê xo mojna ra û va: "Ganî xoverdayîş heta netîcegirewtişî dewam biko. Ganî merdimî bêumîd nêbê. No..."