Cigêrayox / Nuştox Hakan Kerimoğlu deheqê halê Zazakî (Kirmanckî) de vano “Eke îna şêro, yanê badê ma yê ke nika Kirmanckî qisê kenê ra dima, eke jenerasyonê neweyî ziwanê xo nêmusê no ziwan do çîn bibo.”
Kerimoğlu, semedê cuyayîşê Zazakî wazeno wa kes merdişê Zazakî temaşe nêkero, her kes wayîrê ziwanê xo vejîyo.
UNESCOyî serra 2018î de yew rapor hadre kerd û aşkere kerd ke pêroyê dinya de 6 hezarî ra 2 hezar ziwanî binê tehlûkeyî de yê. Tirkîya de zî 15 heb ziwanî binê tehlukeyî de yê û 3 ziwanî zî rewna ra çîn bîyê.
Herêma ma de qasê 6 milyon kesî estê ke ziwanê înan yê dayîke Zazakî (Kirmanckî) yo. La gorê taxmînê UNESCOyî emrê Zazakî 30 serre yo.
“Eke ziwan bimiro kultur zî mireno”
Hakan Kerimoğlu îzah keno ke, semedê Zazakî hîsdarîyêk çin a û veng dano ke wa wayîrê ziwanî vejîyo û îna vano “Ziwanê ma tena se ra 15 yeno qiseykerdiş. Eke ma sey nimune vaje; Mabênê serranê 1937-38î de herêma ma de ziwanê ma se ra se amêne qiseykerdiş. Halê ziwanê ma rind nîyo. Eke îna şêro, yanê badê ma yê ke nika Kirmanckî qisê kenê ra dima, eke jenerasyonê neweyî ziwanê xo nêmusê no ziwan do çîn bibo. Ganî ma merdişê nê ziwanî temaşe nêkerê. Semedo ke wa ziwanê ma aver şêrô û bêro qiseykerdiş xebatî lazim ê. Ganî ziwanê ma pêrûna dezgeyanê ma de bibo ziwano esasî. Semedê ziwanî ganî kursî û mektebî bêrê akerdiş. Û semedê ciwîyayê nê ziwanî ganî ziwanê ma bibo ziwano resmî. Eke ziwan bimiro kultur zî mireno xora. (Çime Pirha)
