Hetê şaredarîya şaristanê girdî û şaredarîyanê qezayan û Heyetê Îdareyanê Herêmkîyan ê Demokratîkan ê DEM Partî ra, bi amancê awankerdişê waranê cuye yê pak, biweşî û domdaran kampanyaya "Bi Keda Kolektîfe Şaristanê Pakî" ame destpêkerdiş.
Çarçewaya kampanya ke do mabênê 10-21ê tebaxe de dewam bikera; zaf cayan ra, kuçe û cadeyan ra heta parkan, waranê keskan ra heta awanîyanê metrukan, do xebatê pakkerdişî bêrê ramitiş.
Eynî wextî de do bi beşdarîya hemwelatîyan xurtkerdişê berpirsîyarîya hempare û hişyarîya cugehî bêro amanckerdiş. Vekîla Serekîya Meclîsê DBByî Evîn Yelboga, Hemvatoxê Meclîsî Ayhan Karatekîn, hemşaredarê şaredarîyanê qezayan, serekê daîreyan, endamê meclîsî, Hemserekê Şaristanî yê DEM Partî û hemwelatî beşdarê kampanya bîyî ke Baglar Dortyolî de dest pêkerd. Badê eşkerakerdişî hemşaredaran û şarê taxe pîya xebata pakkerdişî kerde; hemwelatîyan rê broşûrê agahdarîye ameyî vilakerdiş û ame vengdayîş ke şaristan û waranê cuye rê wayîr bivejîyê.
