Serekê Pêroyî yê Partîya Doza Azade (HÜDA PAR) Zekerîya Yapiciogluyî va, "Mîyanê komelî de kesê ke veradayîşê Selahedîn Demîrtaşî wazenê, estê; la eke bêro veradayîş, hîsê edaletî yê yew perçeyê pîlî yê komelî do zerar bivîno."

Yapiciogluyî îzah kerd ke ê mesele sey "meseleya Kurdan" name nêkenê û wina va:

"Ma tercîh nêkenê ke ney sey meseleya Kurdan name bikerê. Wexto ke merdim vano meseleya Kurdan, fehmêko winasî virazîyeno ke goya Kurdî bi xo yew mesele yê. Welat de yew meseleya Kurdan esta. Nê ra teber, meseleya welatî ya şîdet û terorî zî esta. Ganî merdim nê her diyan nêkero têmiyan. Her di zî yewbînan ra cîya û xoser î."

"Veradayîşê Demîrtaşî”

Serekê HÜDA PARî, cewabê persa "Veradayîşê muhtemelî yê Selahedîn Demîrtaşî do hetê şima de çi hîs virazo?" wina da:

"Nê demê peyênan de Serekê Komîsyonî Birêz Kurtulmuşî Amed zîyaret kerdbi. Ez zî o zîyaret de bîya. Gelek embazê ma yê parlamenterî yê ke endamê Komîsyonî bîyî, estbîyî. Roca îne bîye ke ma şîyî Amed. Nimajê îne ra dima, ma verê Camîya Pîle de roniştî.

Uca de yew welatîyî va ke seba ke proses bi hawayêko erênî aver şêro û şar ci rê bawer bikero, ganî Selahedîn Demîrtaş bêro veradayîş. Mîyanê komelî ra yewna kesî va 'Gelo do Yasîn Boru se bo?' û hêrsê xo mojna.

Mîyanê komelî de kesê ke veradayîşê Selahedîn Demîrtaşî wazenê, estê; la eke bêro veradayîş, yew perçeyê komelî zî esto ke hîsê edaletî yê înan do zerar bivîno."

Tepiştişê demîrtaşî

Hemserekê Pêroyî yê verênî yê HDPyî Selahedîn Demîrtaş, 4ê Teşrîna Peyêne ya 2016î ra nata Zîndanê Edîrne de tepişte yo.

Mehkemeya Heqanê Merdiman a Ewropa (MHME) qerarê xo yê 8ê Temmuze de hukm kerdbi ke tepiştişê Demîrtaşî binpaykerdişê heqan o. Eke Tirkîya heta 8ê Teşrîna Verêne îtîraz nêkerdêne, qerar do bikewtêne pratîk û veradayîşê Demîrtaşî do biameyêne rojdem.

Wezaretê Edaletî yê Tirkîya, rojeke verî ke wext biqedîyo, 7ê Teşrîna Verêne de îtîraz kerd û waşt ke wa dewa seba Dayîreya Pîle ya MHME bêro şawitene. La MHME vizêr nê muracatî red kerd.

Serekê Pêroyî yê MHPyî Devlet Bahçelî vizêr vatibi, ”Veradayîşê Demîrtaşî do bibo wesîleyê xeyran.” Hetkarê Serekê Pêroyî yê MHPyî Fetî Yildizî zî vatibi, “Nika ra tepîya hetê mehkeme ra do qerarê veradayîşî bêro dayîş.”