ZAZAKÎ NEWS - Hêrîşanê hewayî yê Îsraîlî yê vera Lubnanî de roja çarşemeyî (8ê Nîsane) 200 ra zêdêr kesî kişîyayê.
Artêşa Îsraîlî eşkera kerd ke, înan roja çarşemeyî operasyonê hewayî yo tewr hîra yê şerî viraşto û no operasyon vera Hîzbullahî dabi dest pêkerdene. Îsraîlî va ma "nêzdîyê 100 merkezê qomuta û nuqteyê eskerayî" kerdî hedef. Labelê goreyê yew çimeyo eskerî yo lubnanij ke Ajansa France-Presse (AFP) rê qisey kerd, Îsraîlî dayo cayo ke tede sîvîlî vuyenê ro.
Sîvîlanê ke hêrîşê 8ê Nîsane de kişîyay ra yewe zî, şaîra lubnanije Khatun Selma bîye. Khatun Selma mehelaya Tallet el-Heyatî ya Beyrutî de cuwîyayêne.
Edîtorê Weşanî yê Pêroyî yê Weşanxaneyê El-Cedîdî Rasha el-Emîr o ke kitabanê şaîre çap keno, eşkera kerd ke cenazeyê şaîre û mêrdeyê aye Muhammed Krîştî binê xirbe de ameyî vînayîş.
Selma, Universîteya Amerîka de perwerdeyê Ziwan û Edebîyatê Erebkî girewt. Serranê 1970yîyan de wexto ke hema wendekara lîse bîye, programê têlewîzyonî yo bi nameyê “Studio Al-Fann”î de xelatê şîîra Erebkî qezenc kerd.
Serra 2009î de kitabê xo yê şîîran o bi nameyê “Mi Xo Pêşa Cinîyêka Ke Pawe Ya” û serra 2012î de zî kitabê “Ronişteyoxê Peyênî yê Menge” weşanayî.