Nuştox, ziwanşinas û alîmê Kurdî Mehmed Emîn Bozarslan, Swêd de bajarê Uppsala de 91 serrîya xo de şi heqîya xo.
Nuştox û ziwanşinaso namdar o Kurd Mehmed Emîn Bozarslan Swêd de weşîya xo vîndî kerde.
Kênaya Mehmed Emîn Bozarslanî Aycan Şermîne da pêhesnayîş ke pîyê aye bajarê Uppsala yê Swêdî de şi heqîya xo ser.
Ame musayîş ke merasîmê tazîye do bajarê Uppsala yê Swêdî de bêro kerdene û veng dîya pêro dost û embazanê ey ke wa bêrê merasîm.
Malumatê merasîmê tazîye:
- Dem: 11ê Sibate, saete 13:00 – 16:00
- Ca: Stabby Prästgård
- Adrese: Staby backe 1, Uppsala
Mehmed Emîn Bozarslan kam o?
Mehmed Emîn Bozarslan, serra 1935î de qezaya Amedî Licê de ameyo dinya.
Dima ke wendişê xo temam kerd, dest bi melayîye kerd. Dima ra herêma ke tede ameyo dinya, uca miftîyîye kerd.
Dewaya Kurd û Kurdîstanî ser o bi Tirkî xeylê kitabî nuştî.
Kitabê Bozarslanî yo verên o bi Kurdkî (Kurmanckî) “Alfabe” yo. Alfabe, serra 1968î de Stenbol de ameyo çapkerdene. No kitab eynî wext de, kitabo verên ê alfabeyî yo ke Tirkîya de bi herfanê Latînkî ameyo çapkerdene.
Bozarslanî teberê Alfabe de, “Mem û Zîn”a Ehmedê Xanî zî açarnabi Tirkî û no kitab zî serra 1968î de bi Kurdkîya ci ya orîjînale, Stenbol de hetê Weşanxaneyê Hasatî ra amebi çapkerdene.
Her di xebatê Bozarslanî, hetê dozgeranê Amed û Stenbolî ra lez ameyî arêdayene (komkerdene) û Bozarslan ame tepiştene.
O bi îddîaya “xebata seba parçekerdişê Komara Tirkîya û ronayîşê dewleta Kurdan” ameyêne sucdarkerdiş.
Dozgerê Amedî serra 1979î de seba Alfabe û Mem û Zînî vato; “Di dînamîtê ke Bozarslanî waşto bifîno binê sîyasetê Komara Tirkîya”. Dewaya Alfabeyî heta serra 1974î dewam kerde.
Bozarslan, dima tepiştiş û dewayan serra 1979î de vejîya teberê welatî, şi Swêd û xebatanê xo uca domnayî.
Mîyanê xebatanê DDKO û Partîya Demokrat a Kurdîstanî-Tirkîya (PDK-T) de ca girewt. Bozarslanî serê rastnuştiş û ferhengnivîsîya Kurdkî (Kurmanckî) bi desan berhemî nuştê.