Mehmet Ay
No hefte ma do babetê pabesteyîya (girêdayîya) medyayê komelkî ra dewam bikerê. Hefteyo verên de ma qala naye kerdbî ke înternet key kewto cuyayîşê ma, key kewto mîyanê şarê ma yan zî dinya de key vejîyayo. Nika bêrê ma nîşaneyanê na nêweşîye bimusê:
- Vîyarnayîşê wextê xo yê zafî medyayê komelkî ser o,
- Wexto ke medyayê komelkî ra dûrî keweno, xo kêmîvînayîş (kêmasîhîskerdiş),
- Wexto ke nêeşkeno bikewo medyayê komelkî, bîlasebeb hêrsbîyayîş,
- Tena wexto ke medyayê komelkî de yo keyfweşbîyayîş,
- Cuyayîşê xo yê raştî de embazîye qebulnêkerdiş,
- Vînayîşê embazanê xo medyayê komelkî ser o û wextê xo înan reyde vîyarnayîş,
- Bi tewir tewir mojnayîşê şexsîyetê xo,
- Rî bi rî xeberdayîşî/qiseykerdişî ra hesnêkerdiş.
Ma eşkenê nê nîşaneyan zêde bikerê. No mewzû zaf muhîm o, lewra ma zaf eşnawenê ke dormeyê ma de miletê ma na nêweşîye ver bêçare yo.
Dermanê na nêweşîye çi yo?
Çi heyf ke ez nêeşkena vajî ke dermanê ci no yo; çunke na nêweşîye newîye ya, hema 20 serrî yo ke esta û kewta cuyayîşê ma. La zanyarî vanê, ganî yew psîkologê şima bibo, şima tim rî bi rî bi ci reyde pêvînayîş bikerê û eke hewce bikero bi dermanan (ilaçan) tedawî bibê.
Bilxassa ez wazena vajî ke gedeyê ma û cîwanê ma ha tehluke de yê. Çunke hema nezan (naşî) ê, zaf çîyan nêzanê, lez xapîyenê û her çî raşt zanê. Çîyê ke medyayê komelkî de vînenê, erzenê cuyayîşê xo, a ye ra ne ma înan fam kenê ne zî ê ma fam kenê. Na aşme de, nezdîya des kesan semedê ke înternet de qumar kay kerd û cuyayîşê xo kerd zîndan, peynî arde weşîya xo.
Nînan ra yew zî Şafak ÇELÎK o. No merdim yew mamosta bi. Goreyê malumatê ke ma derheqê ey de girewtê; zaf wextê xo medyayê komelkî de vîyarnayo, dima kewto qumar û peynîye de zî qestê canê xo kerdo.
Eke ma wayîrê cîwanan û gedeyanê xo nêvejîyê yan zî ma înan reyde wext nêvîyarnê, ê zî wextê xo danê medyayê komelkî û înternetî. Wa Homa gedeyanê ma û cîwananê ma bipawo.
