ZAZAKÎ NEWS - Dîyasporaya Kurdan, bînaya Parlamentoyê Ewropa ya bajarê Brukselî de Newroz û Serra Newîye ya Kurdan fîraz kerde. Çalakîye, hetê Temsîlkarîya Yewîya Ewropa ya Hukmatê Herêma Kurdîstanî ra, bi hemkarîya (koorîdinasyonê) parlamenteranê Kurdan ê Parlamentoyê Ewropa ameye organîzekerdene.
Kulturê Kurdan de Newroz, yeno manaya serra newîye û newe ra ganebîyayîşê xoza û cuyayîşî.
Xeylê endamê Parlamentoyê Ewropa tewrê çalakîye bîyî. Wexto ke parlamenteran qerqilîyayîşê xo yê seba rewşa nîkayîne ya herême ardî ziwan, înan cimatê mîyanneteweyî rê veng da ke wa seba şarê Kurdî paştîdayîşo hîna pîl bêro dayene.
Hunermend Şivan Perverî zî deyîrî vatî.
"Kurdan rê paştîdayîş, pawitişê ercanê Ewropa yo"
Endamê Parlamentoyê Ewropa Daniel Attard (Sosyal Demokratî) çalakîye de qisey kerd û nê çîyî vatî:
“Ma ewro tîya de têna seba fîrazkerdişê Newrozî nîyê, eynî wext de seba ke ma paştî bidê pêro şarê Kurdî estê. Nê semedî ra tewr tay ganî ma hetê înan de bivinderê û mucadeleyê înan de paştî bidê înan. Ganî ma prensîbanê bingeyênan ê ke ma pêro Parlamentoyê Ewropa de pawenê, bipawê. Kurdî seba çi mucadele kenê? Seba azadî û têduştîye mucadele kenê. Nê, ercê unîversal ê û sinoran vîyarenê. Ma hetê înan de yê.”
Beşdaran hêvî kerd ke wa serra 2726î bibo serrêka wina ke pêrodayîşî (şerî) tede qedîyenê û seranserê Rojhelatê Mîyanênî de îstîqrar virazîyeno.