ZAZAKÎ NEWS — Krîzê bayraga Senegalî ya Mbaye Dîagneyî, dima Îgdîrî na rey Amed de vejîya meydan. Dîagneyî semedo ke şampîyonîya Amedsporî pîroz bikero, keyeyê xo yo ke Amed de yo, balkonê ey de ala Senegalî darde kerd. Rengê ala ke zerd-sûr-kesk ê û mîyan de stêrk esta eleqeyê polîsan ant.
Serek Amedsporî Nahît Erenî derheqê mesela de va:
“Seba bayraga ke Dîagneyî balkonê xo de darde kerdbî, polîsî şîy keyeyê ey. Ê zî şaş bîyî. Dîagneyî xebere da îdarekaranê ma. Ma nêzanenê yewî îhbar kerd yan polîsî bi xo şîyî uca. Labelê dima ke polîsan fam kerd na bayrage ya Senegalî ya, agêrayî û peyser şîyî.”
Îgdîr de zî krîz vejîyabî Seba ala Senegalî, demo ke Amedspor şibi deplasmanê Îgdîrî, uca de zî krîz vejîyabî. Mudûrê Emnîyetî yê Îgdîrî zî vatbi qey na ale sembolê PKKî ya. Badê ke Amedsporîyran va “Na bayraga PKKî nîya, ya Senegalî ya” polîsan dest nêrona ser.
