Şîrketa Future Industries ya ke merkezê aye Amerîka de yo, da zanayîş ke ê seba ke waranê cengî de bêrê xebitnayene, robotanê sey merdiman virazenê. Şîrkete pawena ke bi na teknolojî do merdişê eskeran kêmî bikero, Neteweyê Yewbîyayeyî û pawitoxê heqanê merdiman seba "robotanê kiştoxan" vengdayîşê qedexekerdişî kenê.
Kargorîya teknolojîye ya DYA Future Industries, bi planê xo yê viraştîşê robotanê sey merdiman ê seba waranê cengî, bi mîyanê munaqeşeyan.
Goreyê xabera rojnameyê Independentî yo ke merkezê ey Londra de yo, şîrketa ke serra 2024î de ameya ronayîş; pîya bi otomasyonê fabrîkan û projeyanê girdan ê binawanîye, wazena robotanê ke "do cengê sibarojî raybiberê" zî bîresno. Ame vatiş ke qîmetê şîrkete teqriben bîyo yew mîlyar dolar.
NY û Dêra Katolîkan vera naye vejîyenê
Planê şîrkete yo seba resnayîşê robotanê eskerîye, mîyanê raya pêroyî ya mîyanwelatî de bî sebebê rexneyan.
Sekreterê Pêroyî yê Neteweyê Yewbîyayeyî António Guterresî tewr verî vatbi ke, ganî "robotê kiştoxî" yê ke bê fermanê merdiman qerarê kiştene danê, bi peymannameyêko mîyanwelatî bêrê qedexekerdiş. Dêra Katolîkan zî vera sîstemanê çekanê kîştoxan yê otonoman vejîyena.
"Eşkenê kişyayîşê sivîlan kêmî bikerê"
Şirîkê awankerê Future Industriesî Sankaet Pathakî zî rexneyî qebul nêkerdî û pawit ke robotê bi paştgîrîya zekayê sunîyî do sînoranê dewra sanayîye ya newe akerê.
Pathakî îfade kerd ke robotê sey merdiman ê ke do mîyanê waranê cengî de bêrê xebitnayene, şênê operasyonan bikerê; na zî vîndbîyayîşê sivîlan kêmî kena, weşîya eskeran pawena.
Pathakî da zanayîş ke ganî DYA na babet de pey de nêmana; ey îfade kerd ke Çîn û Rûsya robotê çekdaran yê sey merdiman û sîstemanê sey kutikanê robotan resnenê, coka zî ganî Washington zî wayîrê nê qabiliyetî bo.
