ZAZAKÎ NEWS - Parlamentera Mêrdînî ya DEM Partî Berîtan Gûneş Altin, meseleya heqê perwerdeyîya bi ziwanê Kurdkî, wezîfekerdişê mamostayanê Kurdî ard rojdemê Meclîsê Tîrkîya. Altine waşt ke astengîyê vêrê heqê perwerdeyîya bi ziwanê dayîke wedarîyê.
‘14 serran de tena 210 mamostayî wezîfedar bîyî’
Berîtan Guneş Altin persnameyê xo de îfade kerd ke lazimî bi mamostayanê Kurdî esta û va: “Bajarê sey Dîyarbekirî de lazimîya bi 600 mamostayanê Kurdkî esta, 14 serran de tena 42 mamostayî wezîfedar bîyî. 14 serran de 847 mamostayî beşê Ziwan û Edebîyatê Kurdî ra mezûn bîyî, labelê nînan ra tena 210 mamostayî tayîn bîyî.”
Altine nê persî Wezaretê Perwerdeyî ra persayî:
Seba serra 2024 û 2025î, derheqê dersanê weçîniteyan ê Kurmancî û Zazakî de çira daneyê cîya-cîya yenê vilakerdiş?
Goreyê daneyanê resmîyan, hûmara wendekaranê ke dersanê Kurmancî û Zazakî weçînayî çend a?
Seba wezîfedarkerdişê mamostayanê Kurdî çend kadroyî ameyî akerdiş?
Seba lazimîya mamostayanê Kurdî çi xebata şima esta?
