Platformê Sazgehanê Demokratîkan, qezaya Pîranî de, vera xizmetkarê mektebî Bekîr Akbaba ke 2 serrî gedeya 13 serre îstîmar kerdo, rayîrşîyayîş kerd û eşkerayîya çapemenî viraşt.
Rayîrşîyayîşî rê partîyanê siyasîyan ra, hemşaredarî, temsîlkarê rêxistinanê komelê sivîlî û zaf kesî beşdar bî. Pankartê “Vera îstîmarî bêveng mendiş, wijdanê komelî tarî keno” ame akerdiş û sloganê “Jin jîyan azadî”, “bêveng memanê” ameyî vatiş.
Endama Meclîsê Ciwanan a DEM Partî Merve Oztutuş eşkerayî wend.
Merve Oztutuş îfade kerd ke welat de gedeyî her roje rastê feqîrî û îstîsmarî yene.
Dima, Verfeka Komîsyonê Gedeyan ê DEM Partî Berîtan Guneş Altin qisey kerd û vat: “Ma seba deşîfrekerdişê tecawuzê sîstematîk ê ke vera yew gede ameyo kerdene, tîya de yê. Ma zanê ke mektebî hînî merkezê perwerde-musnayîşî nîyê, bîyê cayê sucan. Eke domanî mekteb de rastê sucî yenê, no nîşan dano ke mektebî nê sîstemî ra cîya nîyê. Ma heme gedeyan ra vanê: Ma sucê ke vera gedeyan yenê kerdene qebul nêkenê û ma bêveng nêmanenê. Ma soz danê gedeyan ke ma do komelêko demokratîk awan bikerê. Wa tu doman û tu cinî xo tena hîs nêkerê.“