ZAZAKÎ NEWS - Paytextê Tirkiya Anqara de, çalakîya yadkerdişî ya serrgêra 10. ya Qirkerdişê Sirucî de xeylê kesî ameyî destbendkerdene.
Rêxistinanê ciwanan, vizêr seba yadkerdişê 33 ciwananê ke qirkerdiş de cuya xo vîndî kerdbi, mehelaya Kizilayî ya Anqara de waşt yew rayraşîyayîş virazê.
Polîsan verê kome ke ver bi Caddeyê Ziya Gokalpî şîyêne girewt û waşt ke ê vila bê.
Dima ke ciwanan rayraşîyayîşê xo de israr kerd, polîsan mudaxele kerd û mabênê protestokaran û hêzanê ewleyîye de alozîye vejîya.
Netîceyê mudaxeleyî de, xeylê çalakvanî ameyî destbendkerdene.
Şubeyê Anqara yê Komela Huqûqnasan a Hemdem (ÇHD) eşkera kerd ke ê rewşa kesanê ke ameyî destbendkerdene, teqîb kenê.
Qirkerdişê Sirucî
Nêzdîyê 300 ciwanê Federasyonê Komeleyanê Ciwanan ê Sosyalîstan (SGDF), 20ê Temmuza 2015î de, seba newe ra awankerdişê Kobanê, Merkezê Kulturî yê Amara yê qezaya Sirucî ya Rihayî de ameyî pêser û yew eşkerayîye daye çapemenîye.
Wextê eşkerayîye de, yew hêrişê întîharî virazîya.
Netîceyê teqayîşî de 33 kesan cuya xo vîndî kerd û zêdeyê 100 kesan zî birîndar bîy.