ZAZAKÎ NEWS - Semedê cezaya Heyetê Dîsîplînî yê Futbolê Profesyonelî (PFDK), maç do bê terefdar bêro kaykerdİŞ, la Şaredarîya Bajarê Girdî ya Dîyarbekirî do seba terefdaran parke de ekranêko gird rono.
PFDKyî, semedê hadîseyanê maçê Amedspor - Erzurumsporî, qerarê 2 maçan bêterefrdar kaykerdişî dabi Amedsporî.
Maç kamcîn kanal de yo?
Maç, şan saete 21:30 de do Stadyumê Dîyarbekirî de bêro kaykerdiş û kay do ekrananê TRT Sporî ra bi hawayêko ganî û bêşîfre bêro weşanayîş.
Stadyum veng o la Parka 75î do bibo stadyum
Semedê qerarê PFDKyî, terefdarî nêeşkenê stadyum de paştî bidê taximê xo. Şaredarîya Bajarê Girdî ya Dîyarbekirî seba na rewşe yew çare dî û eşkera kerd ke do Parka 75î de ekranêko LED o gird bironê, ke terefdarî pîya temaşeyê maçê taxima xo bikerê.
Grûbanê terefdaran ê Amedsporî zî medyaya komelkî ra veng da şarê Dîyarbekirî û va, “Ma taximê xo bi tena nêverdê, ma do verê ekranê girdî de bêrê pêser ke vengê ma bireso stadyumî.”
Rewşa peyêne ya taximan û transferê neweyî
Di hewteyanê lîge yê verênan de, her di taximan zî hema tamê serkewtişî nêgirewto. Hem Amedspor hem zî Sêwassporî bi yew pîyayî û yew meğlubîyet, yewêr pûan girewto û her di taximî zî pawenê ke serkewtişê xo yê yewênî bigîrê.
Amedsporo ke emser bi transferanê xo yê sey Mbaye Diagne, Dia Saba, Emrah Başsan, Aytaç Kara û Felix Afena-Gyanî bale anceno xo ser, wazeno Sêwassporî meğlub bikero û zerrîya terefdaranê xo weş bikero.
