Meclîsê Weşîya Karkeran û Asayîşê Karî (ÎSÎG) eşkera kerd ke Tirkîya de serra 2025î de rojane tewr tay 6 karkerî wextê karî de merdî.
Goreyê rapora ÎSÎGî, serra 2025î de tewr tay 2 hezar û 105 karkerî wextê xebate de merdê.
Meclîsê ÎSÎGî %67ê merganê ke serra 2025î de ameyê qeydkerdiş çapemenîya neteweyî ra, %33 zî embazanê karkeran, keyeyan, sendîkayan, doktoranê cayê karî, pispordanê asayîşê karî, çapemenîya herêmî û çimeyanê bînan ra arê dayê.
Serra 2025î de 2 hezar û 105 karkerî wextê xebate de merdê. Hûmara mergan goreyê aşman wina ya:
Aşma Çeleyî de 180, Sibate de 129, Adare de 158, Nîsane de 158, Gulane de 178, Hezîrane de 161, Temmuze de 212, Tebaxe de 196, Êlule de 208, Teşrîna Verêne de 171, Teşrîna Peyêne 219 û Kanûne de 135 karkerî wextê karî de merdê.
Goreyê nê daneyan, rojane tewr tay 6 karkerî wextê karî de weşîya xo vîndî kerda.
Mîyanê 2 hezar û 105 karkeran ra; 691 karkerî sektorê senayî de, 521 sektorê înşaatî de, 478 sektorê xizmetî de û 415 karkerî zî sektorê ziraetî de merdê.
Meclîsê ÎSÎGî da zanayîş ke mergê tutanê karkeran di serranê peyênan de zêde bîyê: Serra 2024î de 71 tutî wextê karî de merdbîy. No reqem serra 2025î de resayo 94 kesan.
