ZAZAKÎ NEWS- Meclîsê Weşîya Karkeran û Asayîşê Karî (ÎSÎG), raporê xo yê aşma Sibata 2026î eşkera kerde. Goreyê raporê ÎSÎGî aşma Sibate de tewr tay 126 karkerî kar ser o merdê.
Di aşmanê destpêkî yê serra 2026î de tewr tay 284 karkerî wextê karî de merdê.
Aşma Sibate de, beşanê senayî, xizmet û înşaatî de hûmara mergê karkeran zêde bîya.
Goreyê sektoran; warê xizmetî de 40, înşaat de 30 û ziraet de zî 7 karkerî merdê.
Bajarê ke karkerî tewr zaf tede merdê wina yê: Denîzlî, Stenbol, Antalya, Erzirom, Hatay, Aydin, Kocaelî, Zonguldak, Amasya, Anqara, Bursa, Manîsa, Sakarya, Sêwas û Riha.
3 karkerê cinîyî merdî
Aşma Sibate de mîyanê karkeranê ke merdê de tewr tay 3 cinîyî û 6 zî koçberî estbîy. Karkerê koçberî Îran, Sûriye, Azerbaycan û Pakîstan ra ameybî.
Ancî karkeranê ke merdê ra tena yewê înan endamê sendîka bi. 123 karkerî bêsendîka bîy. 2 karkeran ser o zî nêame tesbîtkerdene ke ê endamê sendîka bîyî yan ney.
Goreyê rapora Meclîsê ÎSÎGî, 6ê Sibata 2023î ra nat bajaranê herêma erdlerzî de, wextê viraştişê bînayan (xebata înşaatan) de tewr tay 296 karkerî merdê.
Eynî rapor de ame vatene ke karkeranê înşaatî ra yê ke herêma erdlerzî de merdê 15ê înan domanî (tutî) û 22 zî koçber bîyî. Mîyanê nînan de tena yew karker sey endamê sendîkaye ameyo qeydkerdene.