Reqemê enflasyonî yê aşma tebaxe eşkera bî: Goreyê TÜÎKî se ra 31,51

Goreyê malumatanê aşma tebaxe yê ke TÜÎKî eşkera kerdî, enflasyono aşmane se ra 1,84, enflasyono serrane zî bî se ra 31,51.

Sazgehê Îstatîstîkî yê Tirkîya (TÜÎK), reqemê enflasyonî yê aşma tebaxa 2026î neşr kerdî. Goreyê TÜÎKî, aşma tebaxa 2026î de TÛFE menga verêne gore se ra 1,84 zêdîya. Sereyê serre ra nat enflasyon resayo se ra 22,07î, enflasyono serrane yê TÛFEyî zî bi se ra 31,51. Zêdîyayîşê goreyê diwês mengan zî sey se ra 31,79 ame qeydkerdene.

Grûba Cigêrayîşê Enflasyonî (ENAG) zî malumatê E-TÛFEyî yê aşma tebaxa 2026î eşkera kerdî. Goreyê ENAGî, Endeksê Vayîya Mesrefkerdoxî (E-TÛFE) aşma tebaxe de gorê menganê verênan se ra 2,24 zêdîya. Nisbetê zêdîyayîşê enflasyonê serrane zî sey se ra 49,03 ame hûmaritene.