ZAZAKÎ NEWS - Şaredarîya Baxlarî, çarçiwaya şaredarîya zafziwanîye de; semedê pêro ziwanê ke bajar de yenê qiseykerdiş qerarêko muhîm girewt û "Meclîsê Ziwanî" îlan kerd. Ronayîşê meclîsî, bi kombîyayîşê çapemenîye ame eşkerakerdiş.
Kombîyayîşê ke bînaya xizmetî ya Şaredarîya Baxlarî de ame viraştene rê Hemserekê Şaredarîye Siraç Çelîk, Hetkara Hemserekî Jîyan Aslane, endamê Meclîsî, Meclîsê Ziwanî, mudurê yewîyan û kedkarê şaredarîye tewrê ci bîy.
'Ziwan parçeyê xizmetê kamuyî yo'
Eşkerayîya ke şaredarîye ra ameya dayene de, ame vatene ke seba ke ziwanê dayîke pêro waranê cuyayîşî de biciwîyê û bêrê cakerdene gamêka muhîme ameya eştiş. Eşkerayîye de nê îfadeyî ca girewtî:
“Ewro Baxlar de ma tena meclîsêk îlan nêkenê. Ewro ma, îradeyo ke cuyayîşê zafziwanî paweno û famê şaredarîya ke edaletê ziwanî esas gêna, raya pêroyî reyde pare kenê. Sey Şaredarîya Baxlarî, ma ziwanî sey warêkê sînorkerde û sembolîkî nêvînenê, ma sey parçeyêko cîyanêbîyaye yê xizmetê kamuyî vînenê. Famê şaredarîya zafziwanîye, seba ma yew tercîh nîyo; hewcedarîya îdareyê herêmî yê demokratîkî yo. Nê rastîye ser o, pêro mudurîyet û yewîyê şaredarîya ma, seba caardişê zafziwanîye do mesulîyet bigîrê û gamanê laziman bierzê."
Çelîk: Ma xizmetê zafziwanî danê
Hemserek Siraç Çelîkî qiseykerdişê akerdişî bi Kurmancî, Zazakî û Tirkî kerd û va:
“Ewro seba îlanê Meclîsê Ziwanî ma ameyî pêser. Demêko derg o ke ma seba na xebate ked danê. Seba ke ziwanê dayîke warê kamuyî de bêro xebitnayene, ma do her wezîfeyê ke keweno ma ser bîyarê ca. Ma biqerar ê ke pêro xebatanê xo bi ziwanê dayîke bikerê. Şaredarîya ma de ma bi zaf ziwanan xizmet danê. Bi ziwanê xo yê dayîke ma welatîyan pêşwazî kenê û xizmet danê. Ziwan estbîyayîş, kultur û nasnameyê ma yo. Demokrasîyan de no wina yo. Ganî her kes bieşko xo bi ziwanê xo îfade bikero. Ma mecbur ê ke wayîrê pêro ziwanan bivejîyê.”
Metnê çapemenîye hîrê ziwanan de ame wendene
Dima qiseykerdişê Çelîkî, metnê çapemenîye bi Kurmancî, Zazakî û Tirkî ame wendene.
