ZAZAKÎ NEWS - Semra Guzele, seba fotografanê xo yê ke gerîlayêkê PKKyî reyde estbî, bi îdîaya "endamîya rêxistine" yena muhakemekerdiş
Mehkeme waştişê veradayîşê Parlamentera verêne ya HDPyî Semra Guzele red kerd û qerarê tepişteyîya ci dewam bikero da. Guzele seba fotografanê ke wextê 'prosesê çareserîye' de ameybî antiş, yena muhakemekerdiş.
Ronîştişê dewaye, Mehkemeya Cezaya Girane ya 22ine ya Anqara de ame vînayene.
Semra Guzele bi Sîstemê Veng û Dîmenî (SEGBÎS) hepisxane ra tewrê ci bîye.
Hemvervatoxa HDKyî Meral Danîş Beştaş û parlamenterê Partîya DEMî Halîde Turkoglu, Salîha Aydenîz û Ayten Kordu zî ronîştişê dewaye teqîb kerd.
Dozgerîye bi hincetê "gumanê remayîşî" waşt ke tepişteyîya ci dewam bikero.
Semra Guzele pawitişê xo de vat ke fotografî wextê prosese çareserîye (2013-2015) de ameyê antiş û îfade kerd ke dewlete şîyayîş û ameyîşê înan ra hayîdar bîya.
Semraye da zanayene ke a 4 serrî yo yena muhakemekerdene û seba demê tepişteyîye ganî bêra veradayene û wîna va “Şarî merasîmê çekveradayîşî temaşe kerd. Gelo eke no proses hewl nêqedîyo, do ê zî bêrê muhakemekerdene?”
Avûkatan zî îfade kerd ke dewa sîyasî ya, delîlêko zelal çin o û muwekîla înan 37 aşmî yo tepişte ya, coka ganî bêra veradayene.
Mehkeme waştişê veradayîşî red kerd û qerarê da ke tepişteyîya Guzele dewam bikero.
Ronîştiş heta 3ê Teşrîna Peyêne ya 2025î ame peyde eştene.