Rêxistina Heqanê Merdiman a Îranî ke merkezê ci Norweç de yo, hûmara serra vîyarteyî pare kerd û zêdebîyayîşê hûmara îdaman sey "bêemsal" name kerd.
Rayberdoxê rêxistine Mehmûd Emîrî Muqedemî va: "Rewşe zaf xirab a û 35 serranê peyênan de wîna yew çî nêame dîyayîş. Heta nika Rêxistina Heqanê Merdiman a Îranî hûmarêka wina qeyd nêkerda."
Goreyê raporî, serra 2024î de Îranî 975 kesî îdam kerdbî la serra 2025î de no reqem berz bîyo û resayo tewr tay 1500 kesan. Nê kesan ra zêdeyêrê 700 kesan bi sûcdarîya "madeyanê hişberan" ameyê îdamkerdiş.
Dima 2022yî hûmare zêde bîya
Rayberdoxê rêxistine da zanayîş ke hûmara îdaman dima çalakîyanê Êlula 2022yî (dima kiştişê Jîna Emînîye) bi awayêko verçim zêde bîya.
Serra 2022yî de zêdeyêrê 500 kesan, serra 2023yî de zêdeyêrê 800 kesan, serra 2024î de 975 kesî û serra 2025î de zî hûmare resaya 1500 kesan.
Mehmûd Emîrî Muqedemî va: "Desthilatdarê Îranî cezaya îdamî seba vilakerdişê tersî xebitnenê. Armancê înan o yo ke verê razînêbûnanê neweyan bigîrê la aseno ke nê rojan de ser nêkewtê."
Nika bajarê Lordeganî yê başûrê rojavayê Îranî de mabênê polîs û çalakgeran de pêrodayîş esto. Pêrodayîşanê nê çend rojanê peyênan ê Îran û Rojhelatê Kurdîstanî de çend endamê hêzanê ewleyî û welatîyî ameyî kiştene û 27 kesî zî ameyî dest ser ronayîş.
