Sêwregi de dezgehêko newe yê ziwanî dest bi xebate kerd. Akerdişê ZIWAN-KURDî rê partîyê sîyasîyî, rêxistinê komelê sivîlî, temsîlkarê dezgehan û zaf kesî tewrê ci bîy. Hunermend Hedîye Kalkan, Aylîn Demîrkiran û Hozan Şervanî akerdiş de kilamî vatî.
Akerdişê komele de govende amey girewtiş û tîlîlîyî ameyî vatiş. Pankartê ke akerdiş de ameyî berzkerdiş, bale ante muhîmîya ziwanî ser. Pankartan ser o wina nusîyabi:
- "Dar bi ser kokê xo, merdim bi ziwanê xo beno a zergun" (Pankarto Zazakî)
- "Ey Kurdno! Ya mevajê ma Kurd ê yan zî bi ziwanê xo qisey bikerê"
- "Bi komelê demokratîkî ver bi cuye komunalîste"
Merasîm de sloganê "Jin, Jiyan, Azadî", "Bê ziwan cuye nêbena" ameyî berzkerdene.
Omer Ocalan: Ganî ma wayîrê ziwanê xo bivejîyê
Wekîlê DEM Partî yê Riha Omer Ocalanî akerdiş de qisey kerd û va: "Şarê Kurdî estbîyayîşê xo bi kultur, huner û ziwanê xo pawit. Ganî kes têkoşîn û hewldananê şarê Kurdî qij nêvîno."
Ocalanî bale ante asîmîlasyonî ser û wina dewam kerd: "Heta ke na komele amey ronayîş, zaf problemî ameyî ciwîyayene. Şarê Sêwregi şarêko têkoşer o. Bi seyan serran o ke serê Kurdkî ser o hewldanê asîmîlasyonî estê. Ganî ma wayîrê kultur, ziwan û têkoşînê xo bivejîyê. Ganî Kurdkî seranserê Kurdistan û Tirkîya de vîla bibo û ma bidê ciwîyayene. Seba ziwanî ganî komeleyî bêrê ronayîş û nê komeleyî Rojhelatê Mîyanênî de vîla bibê. Eger ziwan çin bo, ma do roj bi roj estbîyayîşê xo ra dûrî bikewê."
Qiseykerdişan û kilaman ra dima, komele bi pêşengîya Dayîkanê Aştîye ameye akerdene.
