Komîteya Amadekarîye ya Festîvalê Kultur û Tebîatî yê Munzurî, derheqê bernameyê festîvalî yê emserî beyanatêk da
Kombîyayîşê çapemenî yo ke Odaya Bazirganîye û Sanayî ya Dêrsimî de ame viraştiş rê; temsîlkarê partîyanê sîyasî, dezgehanê komelê sîvîlî û komeleyanê herêmkî tewrê ci bîyî. Hemsereka Şaredarîya Dêrsimî Birsen Orhane eşkerayî wend.
Festîval do 4 rojan dewam biko
Orhane da zanayîş ke festîval do tarîxanê 30-31ê temmuze û 1-2ê tebaxe de bêro viraştiş; û îfade kerd ke Festîvalê Kultur û Tebîatî yê Munzurî tena yew aktîvîteya kulturî nîyo.
Orhane îfade kerd ke festîval; organîzasyonêko muhîm o ke tede tebîat, kultur, ziwan, bawerî, huner û qîymetê cuya azade yenê têhet. Aye îzah kerd ke, na çalakîye bi serran o ke rixmê heme astengkerdişan zî dewam kena.
Orhane va: “Pawitişê Munzurî tena pawitişê yew çemî nîyo; pawitişê cuya, ê ameyoxî û ê vîrê komelkî yo.”
Vengdayîşê tewrbîyayîşî
Peynîya beyanatî de Komîteya Amadekarîye ya Festîvalî veng da raya pêroyî û hemwelatî dawet kerdî ke wa tewrê Festîvalê Kultur û Tebîatî yê Munzurî yê 24înî bibê.