Programê Wêjegeh Amed yê aşma Gulane aşkere bîyo û mîyanê na aşme de çalakîyêka Zazakî zî esta.
Omer Barasî yo ke yew kitabê şîîran ”Dijeyê Pistanan” weşanxaneyê Vateyî ra veto, do bibo mêmanê Wêjegeh Amed û derheqê prosesê vetişê kitabê xo û muhtewaya şîîranê xo de qisey biko.
Nuştox û wayîrê Weşanxaneyê Vateyî Denîz Gunduz derheqê şîîranê Omer Barası de vano ke ”Omer Barasi şîîranê xo de kirmanckî bi hostayî şuxilneno û bi sembolanê mîstîk û felsefîkan şîîranê xo newirneno û wendoxî dano fikirnayene û keno zerê yew xeyalê xozayî. Nê hetî ra şîîrê Omerî îmkan danê ma ke hetê fikrî û estetîkî ra şîîranê ci ser o qisey bikerîme. ”
Moderatorîya terraqnayîşî do hetê Gulçîn Şanli ra bêra kerdene û program zî siba saete 17:00 de Wêjegeh Amedî de dest pêkeno.
Yew şîîra Omer Barası
dijeyê şewan a ez
dijeyê şewanê dergan
dijeyê şewanê şima
dijeyê pistanan
seke yeno mi vîr
maya mi zî dije bîye,
pîyê mi zî
Îsa’yî ra zaf verî bi
eşqî ra zaf cuwa pey
mi hewnêko xirab dî şewêk
hema zî ez nêbîya aya
dijeyê şewan a ez
dijeyê şewanê tarîyan
dijeyê mezganê şima
dijeyê pistanan
