Kitabê nuştox û perwerdekarî Haydar Diljenî yo newe, bi nameyê "Raywanîya Çekuyanê Mi", hetê Weşanxaneyê Aryenî ra weşanîya. Kitabo ke 344 rîpelan ra yeno pê, nuşteyanê Diljenî yê 40 serran (1985-2025) ê derheqê perwerde, ziwan, kultur û sîyasetî de ano yewca.
Haydar Diljenî derheqê kitabê xo de va ke amancê ey bi weşanayîşê nê kitabî, ciwîyayîş û parekerdişê fikr, tecrube û îfadeyanê ziwanî yê ke xebatanê bi serran ê seba perwerde, ziwan û edebîyatê Kurdkî (Zazakî) de ameyê kerdene yo. Diljenî îfade kerd ke o hêzanê çekuyan rê bawer keno û vat, "Ciwîyayîşê ziwanî, ciwîyayîşê şarî yo."
Nê nuşteyî ke 40 serran de ameyê nuştene, verê cû kovar û rojnameyanê sey Kovara Vateyî, Berbang, Azadiya Welat, Armanc, Ozgur Politika, Hiwa, Avaşin û Çira de weşanîyayê.
Haydar Diljen, yo ke 1983 de şîyo Swêd, xebatanê xo yê ziwan û kulturî ser o tîya de dewam kerdo. Mabênê serranê 1996-2005an de endamê redaksîyonê Kovara Vateyî û Grûba Xebate ya Vateyî de ca girewto. Hetanî nika bi Kurmancî û Kirmanckî (Zazakî) 14 kitabê ey ameyê çapkerdene.
Weşanxaneyê Aryenî zî derheqê kitabî de va, "Ma ze Weşanê Aryenî zaf serrîfweş ê ke ma dest bi neşirkerdişê kitabanê kirmanckî-Zazakî zî kerdo."
