Bi serekîya Însîyatîfê Cimatkî yê Seba Ziwanê Kurdkî, 750 sazgeh, platform û partîyê sîyasî Amed de ameyî pêser. Sazgehê ziwanê Kurdkî û cimatê sîvîlî bi yew vengdayîş waşt ke wa Kurdkî bibo ziwanê fermî û yê perwerdeyî.
Çalakîye verê Komela Cigêrayîşanê Ziwan û Kulturî ya Mezopotamya (MED-DER) de ame viraştene û xeylê temsîlkarê organizasyonanê cimatê sîvîlî û partîyanê sîyasîyan tewrê çalakîye bîy.
Eşkerayîye de pankartê "Statuya Kurdkî-Perwerdeyîya bi Kurdkî" ame akerdene.
Dima ke qiseykerdişî qedîyayî, deklarasyono pêroyî bi hîrê ziwanan ame wendene.
Metnê Kurmancî hetê Hemsereka Komîsyonê Kultur û Hunerî Heval Dîlbaharî ra, metnê Kirmanckî (Zazakî) hetê Rayberdoxa Enstîtuya Kurdan ya Amedî Suzan Vejan ra û metnê Tirkî zî hetê Hemserekê Şubeyê OHDyî yê Amedî Muhîttîn Mugucî ra ame wendene.
Deklarasyon de îzah bi ke pêro ziwanî ercê bingeyîn yê merdimîye yê û wayîrê heqanê yewbînan ê. Deklarasyon wina dewam kerd: “Çinhesibnayîş, qedexekerdiş, asîmîlekerdiş û hewldayîşê Kurdkî wertê ra wedaritişî, sûcêko pîl o vera merdimîye yo. Ganî ziwanê Kurdkî hetê Dewleta Tirkîya ra bi hawayêko fermî bêro naskerdene û xebitnayîşê ey pêro waranê cuyayîşî de azad û serbest bo.”
Deklarasyon de nê panc waştişê serekî ameyî rêzkerdene:
1. Wa ziwanê Kurdkî bi awayêko fermî bêro naskerdene û bibo wayîrê statuyî.
2. Wa ziwanê Kurdkî sere ra heta peynî bibo ziwanê perwerdeyî.
3. Wa nameyê pêro cayan ê ke eslê xo de Kurdkî yê û ameyê Tirkîkerdene, newe ra bêrê açarnayene Kurdkî ser.
4. Wa pêro astengîyê qanûnî yê ke vera ziwanê Kurdkî estê, bêrê wedaritene.
5. Wa nasnameyê Kurdan qanûnê bingeyênî de bêro pawitene ke wa azadîya ziwanî dayîmkî biba.
Vengdayîşê dewlete
Deklarasyon de vengdayîşê rayedaranê Komara Tirkîya ame kerdene û wina ame vatene: “Ma wazenê ke şima nê waştişanê ma yê merdimîyan qanûnê bingeyênî û qanûnanê xo de qebul bikerê û seba caardişê înan, pêro hewcedarîyanê huqûqî û sîyasîyan bîyarê ca.”