ZAZAKÎ NEWS - Goreyê xeberanê ke bîanetî rojnameyanê herêmî û neteweyîyan ra, keyepelanê xeberan û ajansan ra arê dayê, aşma Sibate de camêrdan tewr tay 22 cinîyî û tutêk kiştî.
Camêrdan tewr tay 43 cinîyan rê şîdet kerd, istîsmarê tewr tay 14 tutan (kêneke û lajek) kerd û 9 cinîyî tacîz kerdî. Camêrdan aşma Sibate de 168 cinîyî mecbûrê karkerîya seksî kerdî.
Sazgehanê çapemenîye aşma Sibate de seba mergê 42 cinîyan û 14 tutan vato "mergê şikdarî".
Kiştiş
Camêrdan aşma Sibate de tewr tay 22 cinîyî kiştî; par eynî aşme de no reqem 17 bi.
Kiştişê gedeyan
Camêrdan aşma Sibate de tutêk kişt. Tutêk hetê pîyê xo yo ke zîndan ra vejîyabi, ame kiştiş.
Tacîz
Camêrdan Sibata 2026î de tewr tay 9 cinîyî tacîz kerdî. Par eynî aşme de no reqem 8 bi.
Camêrdan teberê keyeyî de kuçe, magaza, wesayît û nêweşxaneyan de tacîzê 8 cinîyan kerd. Zereyê keyeyî de zî tacîzê cinîyêke ame kerdene.
Di cinîyî hetê embazanê xo ra, cinîyêke hetê muzîkjenêkî, cinîyêke zî hetê esnafêkî ra maruzê tacîzî mend.
Çapemenîye nênoşto ke 5 camêrdê ke tacîz kerdê, nas bîyî yan nê. Camêrdan 9 cinîyî bi fekkî û fîzîkî tacîz kerdî.
Karkerîya seksî ya mecbûre
Camêrdan aşma Sibate de tewr tay 168 cinîyî mecburê karkerîya seksî kerdî. Par eynî aşme de no reqem 110 bi. Mîyanê înan de tutî zî estbîy. 33 cinî welatîyê Tirkîya nêbîyî (xerîb bîy).
