ZAZAKÎ NEWS - Meclîsê Cinîyan ê Elewîyan ê Komela Demokratîke (DAD), seba 8ê Adare şîy Zîyaretgeha Ana Fatma. Cinîyan verê cû qirnefîlê destanê xo eştî Awa Munzurî (Muzirî), dima ra zî Zîyaretgeha Ana Fatma de gulbangî dayî û loqmeyî (nîyazî) vila kerdî. Cinîyan seba heqîqetê cinîyan û aştîye çilayê Ana Fatma veşnayî.
Dima ra zî eşkerayîye ameye dayene. Çalakîye de Wekîla Partîya DEMî Aytene Kordu û cinîyê Dêrsimijî tewrê ci bîy.
‘Rayîrê ma rayîrê raştîye yo’
Endama Meclîsê Cinîyan ê Elewîyan ê Komela Demokratîke Beser Develîye, serê nameyê cinîyan qisey kerd û wina va:
“Rayîrê ma, rayîrê raştîye yo. Zîyaretgeha Ana Fatma roşnîye dana cinîyan. Mîyanê qewmê ma de cayê cinîyan zaf muhîm o. Kam ke tengîye de yo, kam ke esîrîye (zorbazîye) vîneno, Ana Fatma wa ci rê embaz bo. Ma ameyî tîya seba rindîye û aştîye çilayan (moman) veşnenê.”
‘Ma tena nîyê, ma pîya yê’
Beser Develîye, qiseykerdişê xo de bale ante serê paştîdayîşê cinîyan û wina dewam kerd:
“Sûriye de yew serre ya ke şarê Elewîyî qir kenê, cinîyanê Elewîyan qir kenê. Rojhelatê Mîyanênî de, her ca de şer (ceng) esto. Şer de cinî û domanî yenê kiştene. Ma cinîyî wazenê ke aştîye bêro, rindîye bêro. Dinya de êdî cinîyî vengê xo berz kenê û vanê ke; ma nêwazenê ke seherî ra heta şan bixebitîyê (bigurîyê), ma kiştişê cinîyan nêwazenê. Ma pîya bivinderê. Ma cinîyî, paştî bidê yewbînan, xo pey meancê. Ma weşîye wazenê, rindîye wazenê. 8ê Adare pîroz bo.”
