ZAZAKÎ NEWS- Taximê Amedî Amedspor, do roja Yewşemeyî Boluspor bikero mêman.
Taximo kesk û sûr o ke hefteyê vîyarteyî de vera Hataysporî 3-0 serkewt, bi 67 puanan rêza diyîne de ca gêno. Lîderê lîgî Erziromspor bi 69 puanan lîder o.
Erokspor bi 63 puanan rêza hîrêyîne de û Çorumspor zî bi 62 puanan rêza çarine de cayê xo gênê û seba şampîyonîye mucadele kenê.
Amedspor o ke wazeno maçanê xo yê ke mendê pêro qezenc bikero û derbazê Lîga Superî bibo, seba maçê krîtîkî yê hefteyê 33. yê Lîga 1. amadekarîya xo rameno.
Ekîba keske û sure ya ke wazena bi şampîyonîye zerrîya mîlyonan terefdaranê xo şa bikera, do roja Yewşemeyî keyeyê xo de Bolusporî bikera mêman.
Na merheleya lîgî de êdî heqê Amedsporî çin o ke puanan vîndî bikero.
Seba ke ekîba keske û sure hem ferqê puanan bipawo hem zî şansê xo yê lîderîye zêde bikero, ganî maçê Bolusporî ra bi serkewtiş vejîyo.