Serekê Amedsporî Awuqat Nahît Eren û heyeto ke ey reyde bi, Serewezîrê Herêma Kurdîstanî Mesrûr Barzanî zîyaret kerd.
Eşkerayîya ke hetê Hukmatê Herêma Kurdîstanî ra ame dayîş de wina ame vatiş: "Serewezîr Mesrûr Barzanî, heyetê Kulûbê Amedsporî ke Nahît Erenî zî tede bi, qebul kerd."
Pêvînayîş de heyetê Amedsporî, formaya kulûbî ya bi numreyê 46î ya ke nameyê Barzanî ser o nuştebi, dîyarî kerd.
Kombîyayîş de, derheqê fealîyet û xebatanê Amedsporî de malumat ame dayene. Endamanê heyetî ard ziwan ke ê paştîdayîşê Hukmatê Herêma Kurdîstanî yê seba spor û sporwanan muhîm vînenê.
Serewezîr Mesrûr Barzanî zî bale ante muhîmîya sporî û taximanê Kurdan ser. Barzanîyo ke xebatê Amedsporî teqdîr kerdî, seba kulûbî serkewtiş waşt û va ke ê do her tim bibê paştîgerê spor û sporwanan.
