ZAZAKÎ NEWS - Badê ke Grûba 8. ya Lîga Amatorî ya Herêmîye de 15ê Sibate de musabeqaya mabênê Manisa 1965 Nurlupinar Gençlergucu Spor û Manîsasporî qedîya, qerarê ke hetê heyetê Dîsîplînî ya Futbolê Amatorî ya TFFyî (AFDK) ra ameyî girewtiş bîyî eşkera.
Maç Stadyumê Mumîn Ozkasapî de ame kaykerdiş û taximê wayîrê keyeyî musabeqe 1-0 qezenc kerd. La bi qerarê dîsîplînî netîceyê maçî sey 3-0 "hukmen mexlub" kewt qeydan.
AFDK, semedo ke destpêkê maçî de stadyum de kilamêka Kurdkî ya bi nameyê “Şer Şere” ameye cinitiş, çarçeweyê madeya 42. ya Talîmatnameyê Dîsîplînê Futbolî de ceza birna. Heyetî, teberê cezaya hukmen mexlubbîyayîşî ya taximê wayîrê keyeyî de, 3 puanê înan zî vetî û 5 musabeqayanê resmîyan seba kaykerdişê bêtemaşekerdoxan (bêterefdaran) ceza birnaye.
Nê qerarî ra tepîya, temsîlkarê Manîsa yo ke 47 puanan reyde lîder bi, pêro pîya 6 puanê xo kerdî vîndî. Puanê taximî kewt 41î û ame rêza pancine.
Îdarekarî zî ceza girewtî
Çarçeweyê talîmatê dîsîplînî de, îdarekarê kulûbî zî cezayan ra nesîbê xo girewtî. Azîz Uzbaş, Umut Ordek, Semîh Muhammet Ertetîk, Nesîp Şik, Mehmet Salîh Pektaş û Ahmet Taşdemirî rê 90 rojî cezaya mehrumîyetê heqan amey dayîş. Seba her yew îdarekarî cîya-cîya 15 hezar TL cezaya pereyî ameye birnayîş.
