Merkezê Kultur û Tarîxê Dêrsimî (DKG), derheqê bernameyê akerdişê "Arşîvê Dêrsimî" yo ke do 21-22yê gulane de Berlîn de bêro viraştene de, yew eşkerayîya çapemenîye weşanaye.
Arşîvo ke çarçeweya xebata hemkare ya Unîversîteya Ruhrî ya Bochumî (RUB), Unîversîteya Azade ya Berlînî û DKGyî de ameyo amadekerdene, materyalanê hîrayan yê tarîxê fekkî yê derheqê Qetlîamê 1937-1938î ra virazîyeno.
Şahîdîye, hîkayeyê surgunîye û vîrê komelkî
Arşîv de; îfadeyê şahîdan, hîkayeyê surgunîye, pratîkê bawerîye, kênekanê vîndîbîyayeyan, şahîdîyê operasyonanê leşkerîyan û qeydê ke derheqê vîrê komelkî de yê ca gênê.
Kullîyatê tarîxê fekkî yo ke nêzdîyê 9 hezar deqeyan ra virazîyeno; bi ziwananê kurdkî, tirkî û almankî ame amadekerdene. Arşîv do tora "Oral History Digital"î ser o seba cîgêrayoxan û raya pêroyî bêra akerdene.
Berlîn de sempozyum û merasîmê akerdişî
Goreyê eşkerayîya DKGyî, çarçeweya bernameyê Berlînî de do nê aktîvîteyî ca bigîrê: yew sempozyumo akademîk o mîyanneteweyî, merasîmê akerdişê arşîvî yo resmî, tewrbîyayîşê temsîlkaranê Wezaretê Kulturî yê Federalî yê Almanya û pêşkêşkerdişê akademîsyenanê mîyanneteweyîyan û yê Unîversîteya Ruhrî ya Bochumî.