ZAZAKÎ NEWS - Festîvala Kultur û Xozaye ya Mûnzûrî ya 23. dest pêkerde. Akerdişê festîvale de Hemsereka Şaredarîya Dêrsimî ya verêne Bîrsen Orhane qisey kerd. Orhane, cewa da rexneyanê ke "festîvale xo tekrar kena" da û va, "Festîvala Mûnzûrî yew karakter a û no karakter nêno vurînayîş."
Akerdişê festîvale Meydanê Seyîd Rizayî de ame viraştene. Bîrsen Orhane, destpêkê qiseykerdişê xo de seba kesanê ke Eskîşehîr de adirê daristanî de wefat kerdbî, sereweşîye waşt. Orhane îfade kerd ke Festîvala Mûnzûrî fealîyetêko tîcarî nîyo; hetê kultur, bawerî û ziwanî ra yew vindertiş o.
Seke yeno zanayîş, hunermendo Dêrsimij Mikaîl Aslanî festîvale rê çend rexneyê samîmî kerdbî û vatbi: "Dubare est o. Ganî formatê festîvale de tay vurînayîşî bêrê kerdene."
Orhane, cewabê nê rexneyan de va: "Na festîvale yew karakter o, no karakter nêbedelîyeno. Dêrsim de zaf nasnameyî û bawerî estê. Seba bawerîya Elewîyan hema statuyêk çin a. Cemxaneyî hema zî sey îbadetxane nênê qebulkerdene. Înkarê Elewîyan hema zî est o. Aye ra, vengdayîşê aştî û komelê demokratîkî seba naye yew firsend o. Aşkera yo ke no do bibo yew rol-model. Şarê Dêrsimî no proses bi fedakarîye pêşwazî kerd.
