Suzan Vejan Tatlı

Hetêkî ra çokan ser o, sereyê xo kerdbî bênateyê destanê xo, bi destanê xo goşanê xo bi hewayêko pêt padaybîye, la heto bîn ra?

Heto bîn ra vengê xoverdayîşê berfînan, vengê asmênî yo kewe, vengê boranan..

Çi vengêko mûazzam, çi serewedaritişêko bêemsal!!..

Xo pawitiş, xo newe ra afirnayîş..

Hêdî hêdî çimê xo akerdî û derûdorî ra ewnîyaye la wina biters û xerîb..

Veng birîyabi seke..

Raşta zî veng birîyabi eceba?

Wina bi matmendiş çimî çarnayî dormareyê xo ra.

Seke vajo ke herkes senî nê vengî ra pey wina bi rehetî têgêreno ke!.

Xo têwnêda demêk, wina bi ecêbmayîş xo bi xo qalî kerd. Fekê xo de tayê çîyî pilpilnayî.

Eceba mumkun bi ke nê vengî tena aye bieşnawite bo!

No vengo ke çend rojan de, çend aşman de, heta beno ke çend serran de reyke goşanê ci kerdêne kerr, no vengo ke sere ra heta lingan a recifnayêne.

No vengo ke piştîya ci ra areqêko serdin heriknayêne, la kûrînîya zerrîya xo de germinîya xoverdayîşî zi dayêne hiskerdene.

Raşta zî eceba tena aye eşnawitêne no veng! Mumkun nêbi helbet!! Nêkewtêne sereyê ci.

Demêk wina sey xîntan vindert, dormareyê xo ra ewnîyaye.

Bi çimanê xo yê meraqînan gêrayêne çîyêkî seke.

Seke waştêne bi sivikîya pelêkê huşk, cuya xo ya vindîbîyayeyî rê rêçêke bivîna û bikewa dima.

Rayirêk..

Rayîrêk tena .

Rayîrêko ke peynîya ci de bireso xo.

La ser o çendêk dem vîyartbî qe nêzanayêne.

Aşmêke, serrêke, beno ke emrêk zî bo. Muhîm bi qey? Qetîyen ney.

Gelo şima qet vengê serewedaritişî eşnawito?

Vengê xoverdayîşî..

Waştêne ke nê vengî ra bixelesîyo yan no xora vengê xelasî bi ci rê, nêzanayêne.

La zanayêne ke her ke nê vengî bieşnawo do vengê xo zî hîna pêt bieşnawo, do vengê herre linganê aye ra hîna zêde bilefîyo la do vîç-vîçê teyr û tûran zî bibedelîyo, tewr zêde zî yê boranan..

Tewr zêde zî vengê boranan ra tersayêne xora.

La êdî vengî a qet nêtersnayêne. musaybî êdî çunke.

Nişka ve ra vengêko nas biaramî herikîya ame goşanê aye de pispisna.

Bi peşmirîyayîş verar kerd no vengê yê serran.

Bi peşmirîyayîşêko aramî çim şikite aye înan rê.

Boranî..

Seke ê zî paweyê na game bîyî..

Nika wext wextê vengê vîç-vîçê boranan bi êdî.

Wext bi vîç-vîçê boranan xo xemilnayîş bi êdî.

Wext bi keweyîya asmênî xo têbestene bi.

Wext bi perranê boranan kiriştişê vengî bi.