ZAZAKÎ NEWS - Kaykerdoxa zana û qabîlîyetîne Ceren Moraye ke 5ê Hezîrana 1985î de ameya dinya û eslê xo Amed ra ya. Moraya ke heta nika 19 projeyan de ca girewta, eynî wext de kaykerdoxa sînema û rêzefîlman a.
Ceren Moraye, 5ê Hezîrana 1985î de Amed de ameya dinya. Pîyê kaykerdoxe Amed ra yo, dadîya aye zî Kastamonu ra ya. Aye, qijkekîya xo de bi keyeyê xo reyde şîya Stenbol û cuyayîşê xo yê perwerdeyî tîya de domna.
Moraye, tewr zaf bi rolanê xo yê mîyanê rêzefîlmanê 'Kavak Yelleri', 'O Hayat Benim' û 'Avlu' de yena naskerdene. Aye, emrê domanîye de dest bi perwerdeyê tîyatroyî kerd. Demêk Lîseya Huneranê Weşan a Pera (Pera Güzel Sanatlar Lisesi) de wend. Serra 2005î de Zanîngeha Halîçî, Beşê Tîyatroyî de perwerde dî û serra 2009î de tîya ra mezûn bîye.
Demê ke Moraye perwerdeyê xo yê masterî (lîsansa berze) kerdêne, pîyê aye krîzê qelbî vîyarna û no hedîse, cuyayîşê aye de bî sebebê vurnayîşanê radîkalan. Ê wextan de Moraye rê seba rêzefîlmêk teklîf ame û tecrubeyê xo yê televîzyonî yo verên, serra 2003yî de bi rêzefîlmê 'Serseri Aşıklar'î vîyarna.
Ceren Moraye; serra 2004î de rêzefîlmê 'Dayı'yî de karakterê "Simge"ye û serra 2005î de zî rêzefîlmê 'Nefes Nefese'yî de karakterê "Ezgi"ye kay kerde. Dima ra mabênê serranê 2007-2008î de rêzefîlmê 'Doktorlar'î de bi rola "Senem"e û mabênê serranê 2007-2011î de zî 'Kavak Yelleri'yî de bi rola "Su"ye ekranan de ca girewt. Serra 2012î de rêzefîlmê 'İşler Güçler'î de rola "Zehra"ye, mabênê serranê 2014-2017î de rêzefîlmê 'O Hayat Benim'î de zî karakterê "Efsun"e kerd zindî.
Moraye serra 2014î de mîyanê fîlmê sînema yê 'Bi Küçük Eylül Meselesi' de bi rola "Berrak"e, serra 2015î de 'Yok Artık!' de bi rola "Ebru"ye temaşekerdoxan vernî de bîye. Serranê peyênan de; 'Olaylar Olaylar' (2016) de rola "Merve"ye, fîlmê 'El Değmemiş Aşk'î (2016) de rola "Feryal"e kay kerde. Serra 2018î de fîlmê 'Arada' de rola "Ezgi"ye girot. Rêzefîlmo namdar 'Avlu' (2018-2019) de karakterê "Azra"ye, û serra 2020î de zî rêzefîlmê 'Öğretmen'î de karakterê "Zeynep"e ganî kerde.
Rêzefîlm û fîlmê sînema yê ke Ceren Moraye tewrê înan bîya nê yê:
- 2003: Serseri Aşıklar
- 2004: Dayı
- 2005: Nefes Nefese
- 2007-2008: Doktorlar
- 2008-2010: Kavak Yelleri
- 2012: İşler Güçler
- 2014-2017: O Hayat Benim
- 2014: Bi Küçük Eylül Meselesi (Sînema)
- 2015: Yok Artık! (Sînema)
- 2016: Olaylar Olaylar (Sînema)
- 2016: El Değmemiş Aşk (Sînema)
- 2018: Arada (Sînema)
- 2018-2019: Avlu
- 2020: Öğretmen
- 2021: Yalancılar ve Mumları
- 2021: Olağan Şüpheliler
- 2021: Podact Stüdyo, Artık Hiçbir Şey Bizi Birbirimize Yaklaştıramaz
- 2021: Yakında Ölüm Kime Yakışır
- 2023: Kirli Sepeti
