ZAZAKÎ NEWS - Eylül Yuvanç, keyneka 17 serre ya ke Dêrsim de kewtbî Çemê Munzurî qelbê aye vindertebî. Her çiqas doktoran bi mudaxale qelbê aye newe ra dabi xebitnayîş zî Eylül nêxelesîya û merd.
Hedîse, roja Şemeyo vîyarte, rayîrê Dêrsim-Pulur ser o, herêma Pirdê Vengî de amebi meydan. Goreyê îdîayan, Eylül Yuvanç a 17 serre, wexto ke embazanê xo reyde pîknîk de bîya, kewtebî Çemê Munzurî. Agahdarî ser o, ekîbê ke ameybî herême, aye çem ra vetbî.
Yuvanç, ke bi ambulans erşawîya Nêweşxaneyê Dewlete yê Dêrsimî, tede teqrîben yew saete û nîme mudaxeleyê doktoran ra dima newe ra agêra heyat û zerrîya aye newe ra daybî piro. Demêko kilm Nêweşxaneyê Dêrsimî de beşa xizmetê giranî de mende, semedo ke halê aye cîddî bi, erşawîya Nêweşxaneyê Şaristanî yê Xarpêtî yê Fethî Sekînî.
La, pa pêro hewldanan, Eylül Yuvanç nêamey xelesnayîş û ewro wefat kerd.
Ame musayene ke cigêrayîşo ke derheqê hedîseyî de hetê Serdozgerîya Komare ra ameyo destpêkerdene, dewam keno.