ZAZAKÎ NEWS – Tebîetê Kurdistanî bi serran o hetê şîrketanê taybetan û veşnayîşê daristanan yeno talankerdiş. Şîrketê tîcarî bi serran o ke bi ocaxanê madenî tebîet talan kenê. Yew het ra ware û gelîyê Kurdistanî welatijan rê yenê qedexekerdiş, hetê bînî ra herême seba talanê şîrketanê tîcarîyan serbest a. Daristanî, robarî, çemî, zozanî û pêro tebîet hetê nê şîrketan ra verê çiman de yeno çinkerdiş.
Ê cayanê ke bi madenan ameyo talankerdiş, Çemê Sarumî yo. Çemê Sarumî mabênê Pasûr û Licê de bi serran o herikîyeno. Kurdistan de tebîetanê dewlemend û ganeyan ra yew zî herêma Çemê Sarumî ya. Na herême hetê heywan, dar, daristan, fêkî û nebatanê bînan ra zaf dewlemend a. Masiyê cîya bi cîya, teyrê rindekî herême de cuyenê. Dewijî pêro werd, fêkî û tamê xo tebîet ra arêdanê. La dima sondaj û awankerdişê ocaxanê madenî tebîetê herême yeno talankerdiş. Heywanî êdî nêeşkenê herême de bicuyê. Şarê herême nêeşkeno mîyanê baxçeyanê xo de karê citkarîye bikero.
Dima sondajî awe bîye hişk
Wexto ke herême de dest bi cigêrayîşê madenî û sondajan ame kerdiş, awa çemî pêsa. Şîrketê madenî yê Dîmînî pêro awa çemî anceno û çem beno zuwa. Semedo ke çem beno zuwa, pêro dar, daristan û baxçeyê şarê herême zî huşk benê. Semedo ke awa Çemê Sarûmî bîya huşk, bi hezaran maseyî bêawe mendî û merdî. Şarê herême îzah keno ke awe hetê şîrketanê madenî ra yena xerc kerdene û zaf rojan awa înan çin a. Şarî destnîşan kerd ke dima ke ocaxê madenî ameyî akerdiş, êdî awa çemî bena huşk û nêeşkenê sey verî citkarîye bikerê.
Çimeyê xebere: Ajansa Welat
Omer Demîr
