Platformê Cinîyan ê Dêrsimî, serrgêra mergê Rojîne Kabaîşe de yew rayraşîyayîş viraşt û bi seyan cinîyan waşt ke wa mergê aye bêro roşnîkerdene.
Eynî wext de, teklîfê DEM Partîye yê seba cigêrayîşê na hedîse, Parlamentoyê Tirkîya de ame redkerdene.
Bi seyan cinîyî tewrê rayraşîyayîşê ke Dêrsim de virazîya bîyî û bi yew vengî seba Rojîne Kabaîşe edalet waşt.
Rayraşîyayîşî ra dima, Parkê Seyîd Rizayî de eşkerayîyêka çapemenîye ameye dayene.
"Ma seba Rojîne û Gulîstane edalet wazenê"
Çalakwane Cemîle Yele, eşkerayîye de bale ante serê zêdebîyayîşê merganê cinîyan ê bişikan û wina va:
"Ma êdî nêwazenê cinî bêrê kiştene, her kiştiş teşebusê xo-kiştişî nîyo. Her cinîya ke mîrena, vajîyeno ke xo kişta. Her cinîya ke mîrena xo nêkişena û ez wazena na babete bêro cigêrayene. Ez seba Rojîne û Gulîstane (Gulîstane Doku) edalet wazena."
Cenazeyê aye ser o DNAyê 2 camêrdan amebî dîyene
Cenazeyê wendekara Unîversîteyê Wanî Rojîne Kabaîşe, 15ê Teşrîna Verêne ya serra bîyare de, 18 rojî dima ke bîye vîndî, 24 kîlometre dûrî yurdê ke tede mendêne, qeraxê Golê Wanî de amebî dîyene.
Keye û avûkatanê aye, destpêk ra nata vanê ke Kabaîşe ameya kiştene.
Goreyê raporê Sazgehê Tibê Edlî, cenazeyê Rojîne Kabaîşe ser o DNAyê 2 camêrdan ameyê tesbîtkerdene û no zî gumanê kiştişî hîna keno qewetîn.
"Mesele ameye nimnayene"
Çalakwane Esma Şahîne zî na mesele ser o wina qisey kerd:
"Cenazeyê Rojîne Kabaîşe de DNAyê di camêrdan ame dîyene. Nê DNAyî nêame tesbîtkerdene û na mesele ameye nimnayene. Ez ewro tena seba Rojîne nê, seba xo zî tîya de ya, çimkî çîyo ke ewro ame sereyê Rojîne, meşte do bêro sereyê mi. Ma seba Rojîne Kabaîşe û heme cinîyan edalet wazenê."
Teklîfê cigêrayîşî ame redkerdene
Mergê Rojîne Kabaîşe rojdemê Parlamentoyê Tirkîya de bi.
Serekwekîlê Grûba DEM Partîye Sezaî Temellî, Sazgehê Tibê Edlî bi nimnayîşê delîlan sûcdar kerd û va:
“Ez wazena behsê Rojîne bikera. Sazgehê Tibê Edlî 10 aşmî delîlan nimnayê û no zî vejîya werte. Bifikirîyê, delîlan keno sîya (vîndî keno). Wezaretê Edaletî do na babete de se bikero, ma zaf mereq kenê. No, sûcê nê sazgeyî yo verên nîyo û her tim sûcan keno.”
DEM Partîye seba ke mergê Rojîne Kabaîşe bêro roşnîkerdene, yew teklîfê cigêrayîşî da parlamentoyî, la teklîf bi reyanê MHP û AK Partî ame redkerdene.
